Proyecto conjunto para dotar de nuevas tecnologías a los puertos gallegos

Rosa Quintana presidiu a reunión dos presidentes dos portos estatais na comunidade e Portos de Galica na que se deu conta dos avances nos ‘Smart Ports’

A XUNTA E AS AUTORIDADES PORTUARIAS DE GALICIA IMPULSAN UN PROXECTO CONXUNTO PARA DOTACIÓN DE NOVAS TECNOLOXÍAS AOS PORTOS 
  • A Consellería do Medio Rural e do Mar encabeza a proposta que optará a formar parte dos programas europeos de innovación
  • Permitirá potenciar a xestión sostible das dársenas e a súa integración nas cadeas de loxística intermodais
  A Consellería do Medio Rural e do Mar coordinará a estratexia da Xunta de Galicia e as autoridades portuarias da comunidade para impulsar un proxecto conxunto para a dotación de novas tecnoloxías aos portos de carácter estatal e autonómico. Así quedou de manifesto na reunión presidida por Rosa Quintana, na Autoridade Portuaria de Vigo na que participaron os presidentes dos portos estatatais de Ferrol-San Cibrao, A Coruña, Vilagarcía, Marín-Pontevedra e Vigo, así como o de Portos de Galicia. 

Os máximos responsables do sistema portuario galego ratificaron neste encontro a súa vontade de establecer liñas de traballo comúns para xerar sinerxias que implementen unha oferta portuaria conxunta competitiva de cara ao exterior. Na reunión desta mañá, os participantes deron conta dos avances no proxecto Smart Ports, Portos Intelixentes, para aplicación da I+D+i ás infraestruturas portuarias. 

Neste sentido, as autoridades portuarias galegas e Portos de Galicia están a desenvolver os trámites necesarios para presentar unha proposta conxunta a diferentes convocatorias europeas de financiamento de accións relacionadas coa innovación e o desenvolvemento. A proposta galega pasa pola definición e procura dun modelo de infraestruturas e xestión portuarias baseado na innovación tecnolóxica de cara á xeración de valor engadido ás actividades que se desenvolven nos peiraos de titularidade autonómica. 

A través desta dotación preténdese consolidar a liña de traballo na que se ven avanzando ata agora en relación á planificación e xestión sostible das dársenas e dar un paso definitivo para a plena integración dos portos autonómicos nas cadeas loxísticas e intermodais. 

En relación a este carácter integrador dos Smart Ports, a dotación de tecnoloxía intelixente nos peiraos galegos, potenciará, tamén, a capacidade de coordinación entre os recursos públicos e as necesidades e recursos do capital privado de cara a incrementar a colaboración económica entre ambos. Así mesmo, impulsará unha mellor coordinación transversal entre todas as actividades que se desenvolven nos portos de titularidade da Xunta de Galicia, nomeadamente, pesqueira, comercial, náutica recreativa e transporte de pasaxeiros.

Tráfico de cruceiros
Ao comezo da reunión, Rosa Quintana deu conta tamén do posicionamento de Galicia como destino estratéxico do tráfico de cruceiros polo Atlántico. Así, a Conselleira do Medio Rural e do Mar lembrou o importante volume de actividade neste sentido que rexistra o porto de Vigo, no que atracan de xeito cíclico algúns dos principais buques de cruceiro do mundo. Ademais Quintana destacou a apertura desta nova vía de negocio en peiraos de menores dimensións como os de titularidade autonómica. Neste sentido, lembrou que nos dous últimos anos os peiraos de Viveiro e Brens-Cee teñen acollido tamén tráfico de cruceiros, inaugurando unha nova liña de actividade portuaria, que insiste no carácter multifuncional dos portos galegos. 

Finalmente, a conselleira do Medio Rural e do Mar subliñou a importancia no contexto económico actual de abrir novas vías de explotación económica das infraestruturas portuarias e comprometeu a continuidade do traballo dende o seu departamento para manter a actividade cruceirista no litoral galego.